វិធីហាត់ប្រាណងាយៗ ដែលធ្វើអោយជើង និងដងខ្លួន ស្រឡូនស្អាត

ការហាត់ប្រាណគឺជារឿងមួយដែលមនុស្សគ្រប់រូបគួរតែត្រូវបានអនុវត្តជាប្រចាំ ដើម្បីទទួលបាននូវសុខភាពល្អ។ ប៉ុន្តែការទៅហាត់ប្រាណនៅក្នុងក្លឹបហាត់ប្រាណនានា អាចនឹងមានតម្លៃថ្លៃ ហើយកន្លែងខ្លះទៀតសោតក៏មិនសូវជាមានបរិកាសសមរម្យផងដែរ។ ដូច្នេះប្រសិនបើ លោកអ្នក ចង់បានរូបរាងស្អាត ហើយមិនចង់ចំណាយថវិការច្រើន ដើម្បីទៅក្លឹបហាត់ប្រាណនោះ យើងសូមបង្ហាញនូវវិធីខ្លះដែលអាចអោយអ្នកទាំងអស់គ្នាអនុវត្តដោយខ្លួនឯងនៅផ្ទះ។ វិធីហាត់ប្រាណនេះ នឹងធ្វើអោយ លោកអ្នកទទួលបាននូវ ត្រគៀកហាប់ណែន និងមានជើងស្រឡូនស្អាត។

លំហាត់ទី១ ៖ អង្គុយចោងហោង

·         ជើងទាំងសងខាង ត្រូវញែកចេញពីគ្នា ក្នុងចន្លោះសមរម្យមួយ

·         ដកដង្ហើមចូលអោយវែង និងចាប់ផ្តើម ជំទើតគុទទៅក្រោយ ហើយអង្គុយអោយដូចជាអ្នកកំពុងតែរៀបអង្គុយនៅលើកៅអីមួយ។ ព្យាយាមធ្វើអោយភ្លៅរបស់អ្នកទាំងសងខាងស្របទៅនឹងកម្រាល ឬទាបជាងនេះ(មើលរូប)។

·         ដកដង្ហើមចេញ រួចងើបឈរ។ ធ្វើបែបនេះ ១០ ទៅ ១២ ដង សឹមសម្រាកម្តង ចំនួន ១៥ វិនាទី ធ្វើអោយបានចំនួន ៤ ទៅ ៥ជុំ។

បញ្ជាក់៖ បើអ្នកអង្គុយបានកាន់តែទាប លទ្ធផលកាន់តែប្រសើរ។ ពេលកំពុងហាត់ ត្រូវរក្សាដងខ្លួន អោយត្រង់ និងត្រូវប្រាកដថា ជង្គង់របស់អ្នក នឹងមិនទ្រេតទៅខាងមុខត្រួតស៊ីគ្នាជាមួយនឹងម្រាមជើងនោះទេ។

លំហាត់ទី ២: ពើងខ្លួន

·         ឈរអោយត្រង់ ដោយកន្ធែកជើង អោយធំជាងស្មាបន្តិច

·         ឥលូវចាប់ផ្តើមអោនមកមុខ ដោយរក្សាជង្គង់អោយត្រង់

·         ព្យាយាមបន្ទាបដងខ្លួន រហូតអោយស្របទៅនឹងកម្រាល រួចតម្រង់ខ្លួនឡើងវិញ។ ធ្វើ សារចុះសារឡើង ចំនួន៤ដង ក្នុងម្តងធ្វើអោយបាន ១០សារ។

បញ្ជាក់៖ ការធ្វើបែបនេះ ប្រើប្រាស់សាច់ដុំត្រគៀកដើម្បីលើកដងខ្លួនឡើង ដោយមិនប៉ះពាល់សាចដុំខ្នងនោះ ទេ ប្រសិនបើអ្នកមានអារម្មណ៍ថា សាច់ដុំឆ្អឹងខ្នងកំពុងធ្វើការ គឺបានន័យថា អ្នកហាត់ខុសបច្ចេកទេស ចូរបញ្ឈប់ការហាត់នេះ ដើម្បីកុំអោយប៉ះពាល់ខ្លាំងដល់ខ្លងរបស់អ្នក។

លំហាត់ទី៣ : លោត អង្គុយ

·         ឈរដោយកន្ធែកជើង និងស្មាអោយស្មើគ្នា។ ដងខ្លួនត្រូវធ្វើអោយត្រង់

·         ដកដង្ហើមចូល និងបន្ទាបខ្លួនអង្គុយរហូតដល់ភ្លៅរបស់អ្នកស្របទៅនឹងកម្រាល តែបើអ្នកអាចបន្ទាបបានទាបជាងនេះគឺរឹតតែប្រសើរ.

·         លោតឡើងលើពេលអ្នកដកដង្ហើមចេញ ដោយប្រឹងសាច់ដុំជើង ដើម្បីលោត។ ព្យាយាមលោតអោយបានខ្ពស់តាមដែលអាចធ្វើទៅបាន ហើយត្រូវធ្វើខ្លួនអោយបានត្រង់ដោយចង្អើតជើង ហើយបោះដៃទៅលើ

·         ពេលដែលជើងមកដល់កម្រាលវិញ អ្នកត្រូវបន្ទាបខ្លួន អង្គុយដូចលំហាត់ទី ១។ ធ្វើបែបនេះ អោយបាន ៤ដង ក្នុង១ដង អោយបាន ១២សារ។

បញ្ជាក់៖ ត្រូវប្រាកដថា អ្នកអាចរក្សាជំហរបាននៅពេលធ្លាកចុះវិញ ហើយជង្គង់ត្រូវបន្ទន់បន្តិច។ នៅពេលធ្លាក់ចុះ អ្នកត្រូវបន្ទាបខ្លួនអង្គុយអោយបានលឿន។

លំហាត់ទី៤: អង្គុយចោងហោងកន្ធែកជើង

·         បែរខ្នងរកកៅអី ឬ បង់

·         ដាក់ជើងមួយចម្ហៀងលើកៅអី ហើយឈានជើងមួយចម្ហៀងទៀតទៅមុខ។ រក្សាដងខ្លួនអោយត្រង់ អង្គុយចុះយឺតៗ រហូតដល់ភ្លៅរបស់អ្នកស្របនឹងកម្រាល

·         សង្កត់ទម្ងន់លើជើងខាងមុខ ហើយបន្ទន់វា ៩០ដឺក្រេ ដោយជើងម្ខាងទៀតរក្សាទុកដដែល។ គួរសង្កត់ទម្ងន់ម្តងលើ ចុងជើង ម្តងលើកែងជើង

·         ក្រោកឈរឡើងវិញ។ ធ្វើបែបនេះ ៤ ទៅ ៥ដង ក្នុង១ដង ១២សារ ក្នុងជើងនិមួយៗ។

បញ្ចាក់៖ ប្តូរការសង្កត់ទម្ងន់ ពីភ្លៅខាងមុខ ទៅសាច់ត្រគៀក គឺសំខាន់ក្នុងលំហាត់នេះ។ នៅពេលអ្នកអង្គុយ ព្យាយាមកុំអោយជង្គង់ ទោរនៅពីលើម្រាមជើង។

លំហាត់ទី៥: អង្គុយបែបដង្កាប់

·         កន្ធែកជើងអោយបានធំ។ បែរម្រាមជើងទៅខាងក្រៅ បង្កើតជាមុំ ៤៥ដឺក្រេ

·         បន្ទាប់ខ្លួនចុះយឺតៗ ដើម្បីអង្គុយ ដោយរក្សាដងខ្លួនអោយត្រង់។ ហើយត្រូវឡើងឈរវិញយឺតៗ។ លំហាត់នេះត្រូវប្រើប្រាស់សាច់ដុំត្រគៀកខាងក្នុង ដែលនារីខ្លះពិបាកធ្វើ។

·         ធ្វើបែបនេះអោយបាន ៤ ទៅ៥ដង ១ដង ១០ ទៅ១២ សារ។

បញ្ជាក់៖ នៅពេលអ្នកអង្គុយ ត្រូវប្រាកដថា ជង្គង់របស់អ្នកមិនសង្កត់ទៅលើម្រាមជើងនោះទេ។ សង្កេតលើជង្គង់អោយត្រង់ជាមួយនឹងជើង និងធ្វើលំហាត់នេះជាមួយនឹងដងខ្លួនត្រង់ ហើយត្រូវចាំថា ប្រសិនបើអ្នកចង់បានត្រគៀកស្អាត ត្រូវអង្គុយអោយបានទាបបំផុត។

លំហាត់ទី៦: ការហក់

·         ចាប់ផ្តើមដោយការឈរដាក់ដងខ្លួនអោយត្រង់ ដោយផ្គុំជើងអោយតូចជាងប្រវែងស្មាបន្តិច។

·         ឈានជើងស្តាំមួយជំហ៊ានទៅមុខអោយវែង ហើយបន្ទាបខ្លួនចុះ រហូតទាល់តែភ្លៅរបស់អ្នក ស្មើនឹង កម្រាល។ មិនចាំបាច់មានចលនាស្មា និងដងខ្លួននោះទេ។ ដៃរបស់អ្នក ត្រូវទម្លាក់អោយស្របនឹងដងខ្លួន។ ប្តូរជើង ម្តង់ឆ្វេង ម្តង់ស្តាំ ដោយធ្វើចលនាបែបនេះ ជុំវិញបន្ទប់ ដោយហកបន្តិចៗ ដោយព្យាយាមធ្វើអោយជើងខាងមុខ បង្កើតបានជាមុំ ៩០ដឺក្រេ រវាង ភ្លៅ និងកំភួនជើង។

·         ប្រើកែងជើងដើម្បីលើកខ្លួនអោយក្រោកឈរ ហើយឈានជើងក្រោយទៅមុខ ហើយធ្វើចលនាដូចមុន។

·         ធ្វើបែបនេះ ៤ ទៅ៥ ដង ដោយ ក្នុង១ដង ២០សារ

បញ្ជាក់៖ កុំទ្រេតខ្លួនទៅខាងមុខ ហើយព្យាយាមធ្វើអោយដងខ្លួនអោយត្រង់។ ការហក់បែបនេះ គឺប្រសើសម្រាប់ការធ្វើអោយសាច់ដុំរឹងមាំ ដែលមិនត្រឹមសាច់ដុំត្រគៀកនោះទេ ថែមទាំងសាច់ដុំភ្លៅ និងកំភួនជើងផងដែរ។

លំហាត់ទី៧: ក្រាបលើកជើង

·         លុតជង្គង់ ហើយច្រត់ដៃទៅមុខ អោយស្របនឹងស្មា

·         បត់ជង្គង់ស្តាំ ហើយលើកឡើងលើអោយខ្ពស់ តាមដែលអាចធ្វើទៅបាន បន្ទាប់មកបន្ទាប់វាចុះមុក្រោមវិញ។ ប្រសិនបើអ្នកគិតថាងាយស្រួលពេក អ្នកអាចបន្ថែមទម្ងន់នៅកជើងរបស់អ្នក ដើម្បីអោយកាន់តែមានប្រសិទ្ធិភាព។ ធ្វើបែបនេះ ៤ ទៅ៥ ដង ក្នុង ១ដង ៣០ ទៅ ៤០សារ ក្នុងជើងម្ខាង។

បញ្ជាក់៖ ពេលកំពូងធ្វើលំហាត់នេះ រក្សាលំនឹងពេលលើកជើង ពីរ ទៅ៣វិនាទី ហើយព្យាយាមប្រឹងសាចដុំត្រគៀក អោយខ្លាំងតាមដែលអាចធ្វើទៅបាន។

លំហាត់ទី ៨: លើកចង្កេះ

·         ដេកលើកម្រាល ដោយបញ្ឈរជង្គង់ ហើយកន្ធែកជើងបន្តិច

·         ព្យាយាមលើដងខ្លួនឡើងលើ ដោយប្រើសាច់ដុំចង្កេះ ហើយបន្ទាបវាចុះវិញ។ ប្រសិទិ្ធភាពកាន់តែខ្លាំង ប្រសិនបើអ្នក ញែកជើងចេញពីគ្នា កាន់តែធំ ឬ បន្ថែមទម្ងន់លើដងខ្លួន។

បញ្ជាក់៖ ពេលកំពុងលើកដងខ្លួនឡើង ព្យាយាមប្រឹងសាចដុំត្រគៀកផងដែរ ដើម្បីអោយកាន់តែមានប្រសិទ្ធិភាព។

លំហាត់ទី៩ : លោត ក្រាប

·        ឈរអោយត្រង់ដោយទម្លាក់ដៃអោយស្របនឹងដងខ្លួន

·         បន្ទាបខ្លួនចុះ ដោយធ្វើខ្លួអោយស្ថិតនៅក្នុងស្ថានភាពអង្គុយចោងហោង ហើយចង្អើតម្រាមជើងបន្តិច ដោយយកម្រាមដៃទប់កម្រាល (ហាមច្រត់ដៃ)

·         កន្ត្រាក់ជើងទាំងសងខាងទៅក្រោយ ដោយយកម្រាមជើងទល់នឹងកម្រាល  ហើយដងខ្លួនផុតពីកម្រាល ដោយច្រត់ដៃទាំងសងខាងលើកម្រាល

·         កន្ត្រាក់ជើងចូលក្នុង អោយសិ្ថតនៅក្នុងស្ថានភាពអង្គុយចោងហើយឡើងវិញ។

·         បន្ទាប់មកលោតឡើងលើ

·         ធ្វើវា ៣ ទៅ ៤ ដង ដោយក្នុង១ម្តងៗ អាចធ្វើអោយបានច្រើនសារតាមដែលអាចធ្វើទៅបាន។.

បញ្ជាក់៖ ដើម្បីទទួលបានលទ្ធផលល្អ អ្នកត្រូវធ្វើអោយញាប់តាមដែលអាចធ្វើបាន (កុំបង្ខំ)។ ប៉ុន្តែអ្នកក៏ត្រូវដឹងអំពីកម្លាំងរបស់ខ្លួន ផងដែរ។ ប្រសិនបើអ្នកមានអារម្មណ៍មិនស្រួល ដូចជា ដង្ហក់ ឬបេះដូងលោតញាប់ អ្នកត្រូវបញ្ឈប់ការហាត់ភ្លាមៗ។